Секој напад го краде детството на Кристијан – да му помогнеме!

💛 Нашиот Кристијан – дете со најголемо срце и најтешка борба

Секој ден на Кристијан е полн со контрасти – насмевки, игри, но и стравови и болка. Половина ден го поминува во Дневниот центар, место што го обожава. Таму има свои другарчиња, сака да се дружи, да се смее, да се вози, да слави родендени... 🎂
На 28 септември, го прослави својот роденден – неговиот најсреќен ден во годината. Толку многу се радува, што кога ја нарачувавме тортата, не можеше да ја тргне насмевката од лицето.

Но, зад тие моменти на радост се кријат и денови исполнети со тешки борби.
Кристијан има напади кои доаѓаат ненадејно – без предупредување. Може да се случат додека седи во центарот или дома. Тоа се секундарни исклучувања на мозокот, со трзаи на главата, левата рака и левата нога. Во тие моменти, времето застанува, а стравот е огромен.

Дома со нас е постојано. Физиотерапевт доаѓа секојдневно за вежби, а во Дневниот центар за него се грижи тим од психолог, дефектолог, медицинско лице и придружник. Тоа е местото каде најмногу се чувствува среќен – каде што се смее, каде што е „дел од светот“.

Иако не зборува, разбира сè што му кажуваме. Љубовта му се чита во очите. Кога ќе му подариме нешто ново, се радува како никогаш порано, го прегрнува и не го остава. Толку чиста, детска среќа – а сепак толку ранлива.

Секој ден е борба – особено кога има промени во времето, кога настинува или има температура. Нападите тогаш стануваат уште почести и потешки. А ние, како родители, со секој напад ја губиме душата по малку.

🙏 Затоа, повторно ве молам – не заборавајте на Кристијан.
Вашата поддршка му помага да живее, да се развива, да има терапии, и еден ден, можеби, да може сам да стои, да зборува, да се насмее без страв.