Да го оствариме Божјото видение: манастир „Воскресение Христово“ - Штип

Почитувани браќа и сестри, верници и луѓе со добра волја.
Јас сум Борче, зет на мајка Тодорка жената која преку Божјо видение ја доби светата задача да го возобнови манастирот „Воскресение Христово“ недалеку од Штип. Со благослов на владиката Иларион, официјално сум назначен за домаќин и благајник на овој свет храм, и денес ви се обраќам со отворено срце и една голема, богоугодна молба.

Приказната за нашето светилиште не е обична. Се започна во 1993 година, на првиот ден од Велигден, кога мајка Тодорка ги постави темелите водена исклучиво од она што ѝ беше покажано во видението. Дека Бог навистина го посочи ова место, се докажа подоцна кога официјалните археолошки истражувања потврдија дека токму тука постоел манастир уште од третиот век!

Денес, ова место е живо светилиште кое е официјално признато од МПЦ-ОА и е под закрила на Брегалничката Епархија. Секојдневно пречекуваме верници од цела Македонија кои доаѓаат за молитва, утеха, да наполнат од нашата чудотворна лековита вода или да земат од јаболката за плодност. Дури и Армијата на Македонија секоја година официјално ни помага во организацијата на Велигденската прослава, што дополнително ја потврдува светоста и значењето на овој комплекс.

Но, нашиот Дом Божји се уште не го носи ликот што ѝ беше ветен на мајка Тодорка.
Црквата, која е срцето на манастирот, стои во груб бетон и блок, со недовршен под и влез кој го нема потребното достоинство. Затоа, ја започнуваме нашата донаторска кампања, преку која со ваша помош сакаме да ги завршиме следните работи:

-Бетонирање на подот: За да создадеме цврста и трајна основа на која верниците ќе стојат за време на богослужбите.
-Малтерисување на ѕидовите: Подготовка на внатрешните и надворешните површини.
-Фасадирање со бел камен: Ова е исполнување на самото видение црквата да засветли обложена во бел камен, како симбол на чистотата и воскресението.

На 19 август, за големиот празник Преображение Христово, во манастирот подготвуваме величествена прослава на која ќе настапат неколку македонски ѕвезди. Очекуваме огромен број посетители и нашата најголема желба е токму до овој свет ден да ги собереме потребните средства за да ја започнеме преобразбата на храмот.Сакам лично да ве поканам да дојдете на 19 август, да се помолиме заедно, да се израдуваме на празникот и да ја почувствувате благодатта на ова место. А дотогаш, ве повикувам да донирате и да вградите свој камен во оваа светиња. Ниту еден дар не е мал, бидејќи секоја донација останува како трајна молитва за вас и вашите потомци.

Секој нека дава како што одлучил во срцето, а не со тага или со принуда зашто Бог го сака оној што дава со радост. (Коринтјаните 9:7)

Следете не на нашата Facebook страница-https://www.facebook.com/profile.php?id=61591063610052