Помош за лекување на Орце

Јас сум Орце Димитров од Кратово. Привите симптоми на болеста ги приметив во Р.Италија 2008 година. На почетокот почнав да забележувам дека се чувствувам малаксано, десната рака почна да ми се тресе неволонтирано и левата нога почна да ми се завлечува.

Процесот на лекување во Р.Македонија беше многу бавен.

Матичниот лекар ме препрати на физикална терапија поради завлечувањето на ногата. Физиотерапевтот достави извештај во којшто беше наведено дека најверојатно се работи за мозочен удар, и со упат од матичниот лекар се упатив на одделението за неврологија во Скопје.

Поради бавниот процес на дијагностицирање на болеста се одлучив процесот на лекување да го продолжам во Р.Словенија и Р.Србија. Резултатите од истражувањата во Р.Словенија покажаа дека се работи за Паркинсонова болест. По препорака на лекарите од Р.Словенија терапијата продолжив да ја примам во Р.Македонија. Дел од лекарствата кои ги примам ги купувам во Р.Македонија, а дел ги набавувам од Р.Германија, бидејќи тука не се достапни.

Дополнителните испитувања кои требаше да ги направам во Р.Македонија се одвиваа бавно и макотрпно. За некои од испитувањата мораше да чекам со месеци за да ги направам. Поради тоа, повторно се вратив во Р.Словенија за да ги направам потребните испитувања. Сите трошоци, околу патувањата до Р.Словенија, испитувањата и третманите кои ми беа препишани ги плаќав со сопствени средства.

После повеќе од десетина години лекување, лекари специјалисти од Р.Македонија и Р.Словенија воспоставија дека сите можности за лекување во Р.Македонија се исцрпени и понатамошното лекување треба да се продолжи во странство, каде што треба да се направи оперативен зафат со длабока мозочна стимулација за Паркинсонова болест која што не се прави во Р.Македонија.

Потребните испитувања кои треба да се направат пред оперативниот зафат веќе ги направив во Р.Словенија со сопствени средства. Бидејќи ги исцрпив сите можни финансиски средства, а Фондот за здравство не ги покрива трошоците за овој оперативен зафат, потребни ми се финансиски средства за да продолжам со лекувањето.

Поради болеста секојдневно се соочувам со различни проблеми и потешкотии. По станувањето наутро, морам прво да ја примам терапијата, за да, со помош на сопругата, почнам полека да се движам и да ги извршувам физиолошките потреби. Понекогаш можам да се движам со помош на ортопедско помагало, а кога воопшто не можам да ги мрдам нозете, се движам со количка. Во текот на денот ненадејно ми се јавуваат грчеви во нозете поради кои честопати паѓам и се имам здобиено со неколку повреди, меѓу кои и повреда на пршлен на ‘рбетниот столб.

Освен Паркинсонова болест се соочувам и со дискус хернија, сколиоза, депресија и анксиозност, ангина пекторис.