11-ти август 2025

Шанса за детство: Кристијан ќе започне со своето закрепнување благодарение на стотици добри срца

Кристијан е дете кое од своето раѓање носи во себе необична сила. Тој е посакувано и долгоочекувано дете, чија прва година помина во тивка борба со ретко и тешко заболување – дефицит на декарбоксилаза на ароматична L-аминокиселина (AADC). Станува збор за исклучително ретка генетска дијагноза што влијае на производството на допамин и серотонин во мозокот – витални материи кои директно влијаат на движењето, дишењето и состојбата на нервниот систем.

По месеци на испитувања, грижи и неизвесност, само една недела по неговиот прв роденден, семејството ја дозна тешката дијагноза. Но, заедно со болката дојде и надеж – животоспасувачка генска терапија.

На 3 јуни 2025 година во Париз, Кристијан помина низ 13-часовна интервенција, која му овозможи нов живот. Операцијата беше првиот важен чекор. Сега, на возраст од 1 година и 8 месеци, Кристијан ќе почне од почеток – како новороденче, со потреба од секојдневна рехабилитација, логопедија, физиотерапија и долгорочна специјализирана грижа.

Во оваа битка, семејството не остана само. Кампањата за Кристијан допре до срцата на стотици луѓе. Благодарение на над 708 донатори, собрани се повеќе од 20,070 евра, што ќе му даде шанса за движење, насмевка, игра и нормално детство.

Во име на семејството на Кристијан и платформата PavelAndreev.ORG, благодариме на сите донатори за нивната солидарност.

🔗 Повеќе за кампањата: Кампањата на Кристијан