Да го спасиме срцето на Миле!

Срцето на мојот татко згаснува и работи со едвај 20% сила, а неговиот единствен спас е итна операција во Истанбул за која ни недостигаат 45.000 евра! Од оваа сума буквално зависи дали моите деца засекогаш ќе го изгубат својот сакан дедо, бидејќи нашиот здравствен систем повторно нè остави на цедило.

Мојот татко Миле, кој многумина го знаат како поранешен директор на Паркови и Зеленило и како човек кој секогаш несебично им помагал на луѓето, денес е само немоќен инвалидски пензионер кој повеќе од 10 години мака мачи со срцето кое сè послабо пумпа. Откако не влечеа цели 6 месеци по нашите болници со надеж дека некој од странство ќе дојде да го спаси, на крајот кренаа раце и не оставија сами на себе со зборовите дека тие не можат да ја направат операцијата.

Ова не е првпат нашето семејство да ја плаќа прескапата цена на негрижата. Ние веќе преживеавме еден вистински хорор со мојот брат, на кого мораше да му ја ампутираат ногата бидејќи докторите тука буквално се вежбаа на него. Нема да дозволам сега истото да се случи со татко ми и да чекаме немоќни додека срцето целосно не му откаже затоа што некој со години си игра со човечки животи!

Спас има болницата во Истанбул, каде што имаат искуство со вакви тешки случаи, ни потврди дека можат веднаш да го оперираат. Но, за тоа ни се потребни тие 45.000 евра, сума која по сите наши досегашни голготи, ние како семејство едноставно ја немаме.

Ве молам од дното на душата, како ќерка која не може да гледа како татко и гасне пред нејзините очи. Подајте ни рака во оваа наша голема мака, донирајте уште денес и помогнете ни да му го спасиме животот на Миле пред да биде засекогаш доцна!