Во „Нова Искра“ 12 години творат заедно, сега им треба помош

Хуманитарното мултиетничко здружение „Нова Искра – Нова Надеж“ од Скопје веќе дванаесет години ги собира луѓето со посебни потреби и хендикеп да создаваат со свои раце. Денес имаме 50 членови, а нови се приклучуваат речиси секој ден. Сликаме на стакло и на платно, работиме со глина и восок, а изработките ги продаваат самите членови. Се досега здружението го држевме ние, волонтерите и родителите, од свој џеб. Сега повеќе не можеме сами.

Јас сум Ирена Вујичиќ, претседател на здружението и мајка на лице со посебни потреби. По многу талкање од здружение до здружение, решивме сами да основаме едно, и така сосема спонтано започнавме пред дванаесет години. Еден ден кај нас е полн со радост. Некои работилници се со музика и песна, па заиграме и оро, а секој ден носи по некое изненадување. Сите ги учиме сами да изработуваат и секоја изработка е уникатна, а најмила ни е букетот рози од восок. Мирјана има 38 години и кај нас доаѓа веќе пет години. Најмногу сака да слика природа на стакло. Денес е многу посамостојна и повеќето изработки сака да ги прави сама. Има еден ден што никој од нас нема да го заборави. 

Организиравме мини фудбалски натпревар на стадионот „Истатов“ и секој член доби медал. Дојдоа и дел од македонските фудбалери и се сликаа со нашите членови, потоа сите заедно бевме на ручек, а дружењето го завршивме со многу песни. Без здружението, нашите членови би биле многу тажни и не би имале каде да се дружат. Така мислат сите, и членовите и нивните родители. Досега ние ги купувавме материјалите за да можат членовите да изработуваат и да продаваат, а со тоа да им помагаме и на другите. Секоја година правиме програма за цела година и се трудиме да ја исполниме. 

Повеќе не сме во можност тоа да го правиме сами, затоа решивме да побараме помош. Со вашата помош ќе можеме на членовите да им обезбедиме храна и облека, да ги носиме на едукативни прошетки и да купиме материјали за уште повеќе изработки, бидејќи се навистина многу креативни. Ве молам, донирајте. Ако не можете, споделете ја кампањата, за да стигне до повеќе луѓе.