Васко живее сам и се плаши дека срцето ќе му застане

Најмногу се плашам дека срцето ќе ми застане ненадејно, а дома сум сам. Јас сум Васко од Штип. Главната лева артерија, која го храни најголемиот дел од срцето, ми беше запушена 99%. Ми вградија стент, но тегобите останаа. По помалку од 100 метри пешачење морам да застанам и да седнам. Лекарите бараат нови испитувања, а јас живеам сам од социјална помош, која не ми стигнува ни за лековите.

Цел живот свирев тапани и во Штип ме познаваат како музичар. Последните седум години не можам да свирам. Денес не можам сам ни да се избањам.

Пред седум години се разболев од цироза на црниот дроб и оттогаш не можам да работам. Цирозата засега е под контрола, но токму поради неа не смеам да одам на бајпас. Во мај минатата година, на коронарографија, ми утврдија дека главната лева артерија е запушена 99%. Стентот морав да го добијам на многу чувствително место, во пределот на левата главна коронарна артерија, означено како LAD–LMN. Зафатот беше многу ризичен, особено поради мојата цироза. Интервентниот кардиолог вложи голем труд и направи се што можеше за да го постави стентот, и благодарен сум му за неговата посветеност. Но помина повеќе од една година, а тегобите се дури полоши.

Денес секоја домашна работа ми е потешкотија. Миењето садови, чистењето и грижата за себе ми одземаат сила за цел ден.Сам не можам да си зготвам јадење. Не можам да се качам ни да се симнам по скали. Покрај стравот од ненадејна смрт, се плашам и дека, не дај Боже, ќе останам неподвижен во кревет, сам, без никој до мене.

Во приватна болница во Скопје лекарот ми препорача повторна коронарографија, магнетна резонанца на срцето и тестови што ќе покажат дали лековите што ги пијам воопшто делуваат кај мене. Јас сум ризичен пациент, со цироза и алергија на контраст, па коронарографијата мора да се прави со посебна подготовка. Во државните клиники ова го нема. Испитувањата ќе им покажат на лекарите зошто тегобите не поминуваат и што треба да се направи понатаму. Без нив не можат да знаат дали стентот работи и дали лековите ми помагаат, а јас секој ден живеам со истиот страв.

Ве молам, донирајте. Ако не можете, споделете ја мојата приказна.