Изградба на нов објект во склоп на Црквата Свети Атанасиј

Јас сум дел од малата заедница во селото Чајле, Гостивар, каде живеат околу 350 луѓе. Во нашето село се наоѓа црквата „Свети Атанасиј“. Пред две години успеавме да ја обновиме надворешноста на црквата околу 90%, но останува уште дел од надворешниот и внатрешниот дел да се довршат.

Со голема верба и желба, започнавме изградба на нов објект од 250м² – од кои 200м² ќе бидат простор за гости, 30м² кујна и 20м² тоалет. Оваа помошна просторија ќе ја користиме за собирање на верниците за време на најголемите верски празници – Бадник, Божиќ, Водици, Велигден, Св. Атанасиј и други. На овие празници се собираме околу 250 верници, па токму затоа ни е од огромна потреба овој простор.

Нашата црква нема црковен имот и други приходи, освен скромните донации од жителите на селото Чајле. Затоа ни се потребни дополнителни донации за да ја довршиме изградбата и да создадеме место достојно за сите. За таа цел, организираме и работни акции, каде што соединувајќи се со нашите соседи, вложуваме труд и време во оваа света мисија.

Со изградбата на овој објект сакаме да создадеме простор кој ќе нè обединува, ќе придонесува за негување на христијанските вредности, традицијата и заедништвото. Верувам дека секоја ваша поддршка – духовна, материјална или доброволна – е чекор поблиску до остварување на оваа света мисија.